„ვეფხისტყაოსანი“ პროზაული ფორმით და ახალი ილუსტრაციებით გერმანიაში გამოიცემა. გერმანული გამომცემლობა Galiani Berlin პროექტს „მოგზაურობა რუსთაველის ნაკვალევზე“ ქართული წიგნის ეროვნული ცენტრის მხარდაჭერით განახორციელებს. პროექტზე გამომცელემლობის ხელმძღვანელი, ვოლფგანგ ჰიორნერი ცნობილი გერმანული გაზეთის Frankfurter Allgemeine Zeitung-ის ჟურნალისტთან ტილმან შპრეკელსენთან და ილუსტრატორ კატრინ მენშიკთან ერთად იმუშავებს. ამ მიზნით სამივე მათგანი თბილისს 16 მაისს ესტუმრა.

დაგეგმილია შემოქმედებითი ჯგუფის სამდღიანი კვლევითი მოგზაურობა საქართველოს რეგიონებში და შოთა რუსთაველთან დაკავშირებული გეოგრაფიული პუნქტების დათვალიერება-შესწავლა. მარშრუტი მოიცავს ასპინძას, ბათუმს, ვარძიას, ქუთაისს. ასევე, შოთა რუსთაველთან დაკავშირებული ხელნაწერების და მინიატურების გაცნობა და შესწავლა ეროვნულ მუზეუმში, ხელნაწერთა ცენტრსა და ეროვნულ არქივში; პროექტის ავტორები შეხვდებიან ქართული ლიტერატურის კრიტიკოსებსა და რუსთველოლოგებს.

მოგზაურობის შედეგად მოპოვებული მასალა და გადაღებული ფოტოსურათები გადამუშავდება გამოცემლისა და ტექსტის ავტორის მიერ. Frankfurter Allgemeine Zeitung-ის ჟურნალისტი ტილმან შპრეკელსენი ორიგინალ ტექსტზე დაყრდნობით ახალ პროზაულ ტექსტს პოპულარულ ენაზე შექმნის, ხოლო ილუსტრატორი, კატრინ მენშიკი, წიგნს ტექსტისთვის შესაფერისი თანამედროვე ილუსტრაციებით გააფორმებს.

წიგნი გერმანულ გამომცემლობაში Galiani Berlin 2018 წელს გამოიცემა და წარმოდგენილი იქნება 2018 წლის ფრანკფურტის წიგნის ბაზრობაზე წიგნის ცენტრის მხარდაჭერით გამოცემული სხვა უცხოენოვან გამოცემათა შორის.

აღსანიშნავია, რომ გამომცემლობის ამავე სერიაში, კლასიკური ლიტერატურა, გამოცემულია გასული წლების საპატიო სტუმარი ქვეყნების ისლანდიის (ისლანდიური საგა 2011 წელი) და ფინეთის (ფინური ეპოსი „კალევალა“ 2014 წელი) ორივე გამოცემა მიეძღვნა ისლანდიისა და ფინეთის ფრანკფურტის წიგნის ბაზრობაზე სტუმარი ქვეყნების სტატუსით წარდგენას. რამდენადაც 2018 წელს საქართველო მიიღებს სტუმარი ქვეყნის სტატუსს, გამომცემელს აქვს სურვილი ქართული ნაციონალური ეპოსიც გამოიცეს ამ სერიის ფარგლებში.